Në strategjinë e tij për bllokimin e liberalizimit të vizave për shqiptarët, Edvin Rama po përdor jo vetëm bojkotin, jo vetëm kërkesat e emisarëve të tij për mos heqjen e vizave në qarqet diplomatike, por ai dje kaloi edhe në shpifje, trillime e fallsifikme të ulta për sistemin e identifikimit të qytetarëve shqiptarë.

Dje nëpërmjet numrit dy të Partisë Socialiste, Kryetarit të Grupit Parlamentar Gramoz Ruci, paraqiti dëshmitë e tij fallco për sistemin e lëshimit të letërnjoftimeve elektronike dhe pasaportave biometrike duke nxjerrë para kamerave dokumenta të prodhuara nga Taulant Balla në kazinonë e tij të preferuar në Tiranë, dhe i serviri ato si letërnjoftime elektronike të prodhuara nga dy tre herë për të njëjtin person.

Me këtë sulm armiqsor ndaj liberalizimit të vizave, Edvin Rama hoqi cdo maskë dhe u tha shqiptarëve se është i gatshëm të mos ndalet para përdorimit të cdo të keqe për ti ndëshkuar ata për qëllime personale.

Partia Demokratike i kërkon Prokurorisë së Shtetit që bazuar në ligjet e vendit, të cilat kanë penalitete të rënda për fallsifikimet e dokumentave të identitetit të ndërmarrë një hetim urgjent për ndëshkimin e këtij akti të shëmtuar të zotit Rama.

“Dëshiroj t’ju informoj ju, dhe përmes jush publikun, se grupi parlamentar i Partisë Demokratike ka vendosur t’i propozojë Kuvendit të Shqipërisë miratimin e një rezolute që të mbështesë procesin e liberalizimit të vizave.

Duke e konsideruar atë si një aspiratë jetike në interesin e drejtpërdrejtë të cdo qytetari shqiptar, ne vlerësojmë hapat e deritanishme të ndërmarra nga qeveria dhe të gjitha institucionet e tjera shtetërore, në funksion të këtij qëllimi madhor.

Rezoluta ka për qëllim të inkurajojë ekzekutivin dhe cdo agjenci tjetër të lidhur drejpërdrejt apo në mënyrë indirekte me procesin, duke ftuar njëkohësisht cdo aktor politik dhe shtetëror që të përfshihet me të gjitha kapacitetet dhe mundësitë e veta në përmbushjen sa më të shpejtë të tij.

Për grupin parlamentar të Partisë Demokratike, liberalizimi i vizave nuk është thesht një premtim i yni elektoral, por një objektiv i madh kombëtar, ndaj edhe ai ka nevojë për kontributin e gjithësecilit.

Duke pasur parasysh peshën e madhe që ka Kuvendi në hierarkinë institucionale të Republikës sonë, si dhe nisur nga fakti që koha është një element shumë i rëndësishëm për këtë proces, kjo rezolutë do të paraqitet për miratim në seancën më të afërt, pra të enjten e ardhshme”.

Partia Demokratike përshëndet raportin tejet realist dhe vlerësues për luftën e bërë nga Qeveria Shqiptare dhe Policia e Shtetit kundër trafikut ndërkombëtar të narkotrafikëve.

Në raportin e tij, Departamenti Amerikan i Shtetit vlerëson masat dhe politikat agresive të marra nga Qeveria Shqiptare si dhe ruajtjen e brigjeve nga Policia e Shtetit duke ndërprerë ato që raporti i quan “rrugët historike të kontrabandimit të drograve përmes detit Adriatik” dhe duke i spostuar ato në territorin e Malit të Zi, Serbisë dhe Bosnjes etj.

Raporti bën qartësisht ndarjen që nga viti 2005, datë nga e cila Shqipëria qeveriset nga mazhoranca aktuale duke listuar masat e marra që nga moratoriumi për skafet , instalimi i radarëve të survejimit të detit, shtimi i kapaciteteve lundruese të Rojes Bregdetare, cka sic shprehet Raporti ka sjellë si rezultat që rruga e preferuar prej trafikanteve të jetë tashmë ajo përmes Serbisë dhe Bosnjes me destinacion Italinë.

Raporti i krahason rezultatet e sotme të qeverisë Shqiptare me ato të një viti më parë sepse me rezultatet e arritura në luftën kundër krimit të organizuar e trafiqeve, kjo qeveri mund të krahasohet vetëm me vetveten dhe me asnjë qeveri paraardhëse.

Përsa i përket përmëndjes në raport të imuniteteve si pëngesë e organeve të drejtësisë për të finalizuar luftën kundër cdo lloj fenomeni negativ, Partia Demokratike i bën thirrje opozitës shqiptare të bashkojë votën me mazhorancën aktuale për të hequr imunitetin, duke dëshmuar kështu vullnetin e hekurt të opozitës për të kontribuar kundër implikimit të politikës me krimin e organizuar.    

U bënë disa ditë me radhë që kryetari i Partisë Socialiste, zoti Edi Rama, po thërret EUREKA për njërën prej 4753 kutitë e votimit të zgjedhjeve të 28 qershorit, atë të Rushdies së famshme, duke keqpërdorur dhe keqinformuar për këtë mediat e Tiranës.

Unë sot jam para jush për të sqaruar një herë e mirë publikun, për sa më poshtë vijon:

Në fshatin Rushdie, pasi votimi kishte nisur, tre komisionerë socialistë u larguan nga qendra e tyre, për të mos u kthyer më atje, duke marrë me vete edhe njërën nga vulat.

Gjykata e Apelit, apo Kolegji Zgjedhor, pasi mori në shqyrtim rastin, nuk vendosi përsëritjen e votimit në Rushdie, por i deklaroi të pavlefshme 425 votat e gjetura në kuti, që në fakt përbënin 90 përqind të numrit të atyre që kishin votuar në atë fshat. Dhe sic është bërë e njohur tashmë, ky vendim solli për pasojë humbjen e një mandati të Partisë Demokratike në Qarkun e Fierit.

Pas kësaj prokuroria dhe gjykatat e vendit, bazuar në pretendimet e forcave politike, kanë marrë në shqyrtim dhe në ndjekje penale përgjegjësit për probemet e krijuara në atë qendër votimi.

Partia Demokratike, duke theksuar se simetria bipartizane në komisionet zgjedhore është kushti vendimtar për integritetin e procesit, ka mbështetur dhe mbështet organet gjyqësore dhe prokurorinë në nxjerrjen e të githa përgjegjësive për Rushdien dhe për cdo rast tjetër, mbi bazë e fakteve dhe provave të paraqitura nga subjektet poltike dhe administrata zgjedhore.

Dhe në këtë këndvështrim parimor, e ftojmë zotin Rama, që ashtu sic e pranoi vendimin e Kolegjit Zgjedhor për Rushdien, nëpërmjet të cilit përfitoi një mandat, të pranojë dhe respektojë edhe cdo vendim tjetër të tij.

“Konferenca arriti konsensus përsa i përket procedurave të trajtimit të dy nismave ligjore të PS-së. Në fakt pas diskutimeve ne mbetëm pak të befasuar nga kërkesa e z. Ruçi, i cili kërkonte që nisma e tyre për ngritjen e komisionit hetimor të trajtohej pas shqyrtimit të projektligjit “Për organizimin dhe funksionimin e komisioneve hetimore”, gjë që shkaktoi pak habi për shkak se ne e kemi konsideruar si kauzën më të rëndësishme të PS-së në këto gjashtë muajt e fundit, e cila sigurisht që mbështetet dhe në legjislacionin në fuqi, ku përfshihet dhe ligji “Për organizimin dhe funksionimin e komisioneve hetimore”.

Por, nëse ramë dakord që të dy nismat ligjore të PS të trajtohen pas dy javësh, pra me datë 18 në seancë plenare, sigurisht që nuk mund të kishte konsensus përsa i përket përmbajtjes së tyre, pasi ne mendojmë se gjithshka duhet të jetë korrekt dhe kompatibël me Kushtetutën e vendit, me vendimin e Gjykatës Kushtetuese dhe me ligjet e tjera të vendit.

Dhe unë e ftova me shumë mirëkuptim z. Ruçi, që së bashku, gjatë kësaj kohe të ulemi dhe të diskutojmë në mënyrë që të bëjmë sa më të përshtatshme me Kushtetutën dhe ligjet e tjera të vendit, të dy nismat ligjore të grupit parlamentar të PS-së,  në mënyrë që të gjejmë zgjidhje për të dy palët”.

Fjala e Kryetarit të Partisë Demokratike dhe Kryeministrit të vendit zotit Sali Berisha në mbledhjen e grupit parlamentar të PD-së.

“Zonja dhe zotërinj deputetë,

Është kënaqësi për mua që fjalën time para jush ta filloj me një lajm shumë pozitiv. Eksportet e Shqipërisë, treguesi më i ndjeshëm i shëndetit të ekonomisë shqiptare, për muajin shkurt 2010 duke i krahasuar me muajin shkurt të vitit 2009 kanë një rritje në ton. Nga 83 mijë ton në vitin 2009 në 129 mijë ton në shkurtin e vitit 2010. Rritja në vlerë është shumë më e madhe. Në rast se eksportet e shkurtit të vitit 2009 kanë qenë gjithsej 2.2 miliardë lekë, eksportet e shkurtit të vitit 2010 janë 4.5 miliardë lekë. Është një rritje mbi 100 për qind. Këtu bëhet fjalë për mallrat “Made in Albania”. 

Një bilanc qartësisht më pozitiv se sa shkurti i vitit 2009, por për hir të së vërtetës edhe më pozitiv se sa janari i vitit 2009, paraqesin eksporti i mallrave të përpunuara, rieksporti i mallrave të përpunuara apo fason. Këto mallra nga 6.4 tonë që kanë qenë në vitin 2009 arrin në 15 mijë në shkurtin e vitit 2010. Në vlerë nga 5.2 miliardë lekë arrin në 6.7 miliardë lekë. Ky sektor, me një rritje prej 27-28 për qind, është ndoshta një nga sektorët më të rëndësishëm për punësimin e qytetarëve shqiptarë. Jua dhashë këto të dhëna si lajme jashtëzakonisht pozitive për ekonominë dhe trendin e saj. Gjithashtu, jua dhashë këto të dhëna me qëllimin më të mirë që ata të cilit flasin për krizë t’i heqin syzet e krizës apo të ndërrojnë lentet dhe të lexojnë realitetin ashtu siç është. Një realitet i tillë është ndër më pozitivët, sepse të arrish të dyfishosh vlerën e eksportit nga viti 2009 në vitin 2010 përbën një arritje shumë të madhe. Të rrisësh rieksportet do të thotë se brendet tona janë jashtëzakonisht të vlerësuara, sepse Evropa ku ne eksportojmë nuk ka dalë tërësisht nga kriza, nuk është se ajo është në kapacitetet e saj maksimale të importeve. Kjo do të thotë se prodhimet tona kapin cilësia të parefuzueshme. Kjo është arsyeja që ka një rritje të mrekullueshme prej 27 – 28 për qind të rieksporteve.

###

Siç jeni në dijeni, Partia Socialiste ka sjellë në Parlament dy nisma legjitime parlamentare. Njëra është ligjore dhe tjetra është për ngritjen e Komisionit Hetimor Parlamentar në përputhje me nenin 77 të Kushtetutës, në përputhje me të drejtën që kanë dhe me ligjin për Komisionet Hetimore Parlamentare. Këto nisma do të trajtohen me seriozitetin më të madh, me angazhimin më të madh, në përputhje me Kushtetutën dhe ligjet e vendit. Mesa di unë, Kryetarja e Parlamentit do të njoftonte udhëheqësin e Partisë Socialiste për këtë.

Gjatë këtyre ditëve, siç edhe e dëgjuat, unë përshëndeta dhe të gjithë e përshëndetët hyrjen e grupit parlamentar të Partisë Socialiste në Parlament, por në media, në mënyrë të përsëritur, janë hedhur akuza nga eksponentë socialistë, të cilët thonë se hymë pa marrëveshje në Parlament, sepse Berisha nuk ofroi marrëveshje.

Për dy arsye unë do të bëj disa sqarime. Arsyeja e parë është se këto janë akuza të pabaza dhe arsyeja e dytë është se në konceptin tim qytetarët duhet të dinë se çfarë diskutohet pas dyerve të mbyllura. Dyert e mbyllura janë të nevojshme për bisedime, por edhe transparenca ka domosdoshmërinë e saj meqenëse diskutohej për probleme me interes të madh publik dhe jo për probleme personale. Në takimet me Presidentin e Republikës kam shkuar me vendimin më të prerë për kontribuar në suksesin e tryezës. Thelbi i qëndrimeve që ne kemi mbajtur në atë tryezë ka qenë: ne jemi të gatshëm për çdo koncesion që ka të bëjë me zgjedhjet. Pra, listo çdo gjë përveç problemeve që nuk kanë të bëjnë me ne. Ato probleme nuk i kanë me ne, janë probleme me gjykatat. Nuk e konsideroj se mund të jetë në dorën tonë. Një mik i shquar dhe një personalitet i shquar në Evropë do të më thoshte se të mendosh të kapësh në dorë vendimet e gjykatave është njësoj sikur të kapësh në dorë demokracinë, por demokracia nuk kapet me dorë. Ky ka qenë qëndrimi im në takimin tri lateral apo bilateral me Presidentin e Republikës.

Një përpjekje shumë të madhe dhe shumë pozitive bëri Komiteti Presidencial i Këshillit të Evropës. Komiteti Presidencial i Asamblesë së Këshillit të Evropës punoi në mënyrën më intensive. Pasi takuan të gjitha palët, ata kërkuan jashtë axhendës një takim të përbashkët në praninë e Presidentit të Republikës dhe të dy palët e pranuam. 

Si Komitetit Presidencial, ashtu edhe ndërmjetësit e mëparshëm, të një profili të lartë, u është dukur shumë i arsyeshëm dhe është pranuar nga unë qëndrimi që të gjitha problemet që zoti Rama ka me fakte dhe prova dhe që implikojnë në një mënyrë ose në një tjetër hapjen e kutive, t’ia adresojë Prokurorisë së Shtetit, e cila në Shqipëri nuk është degë e Ekzekutivit. Dhe Prokuroria e Shtetit, ka të gjitha të drejtat ligjore për të ushtruar të gjitha kompetencat, të cilat ajo mendon se i duhen për të kompletuar hetimin. Kjo pranohej nga unë si koncesion, pavarësisht se ka skaduar çdo afat për hetimin ligjor të këtyre zgjedhjeve. Por unë e pranoj plotësisht. Natyrisht, kjo nuk u pranua nga zoti Rama. Ndaj dhe në qoftë se nuk pati marrëveshje, nuk ishte për shkakun tim. Tani duhet të jemi të hapur, në tryezë u shtrua opsioni tjetër, sepse çfarë doli e qartë si kristal, ishte kjo: kërkesa për hapjen e kutive nuk mund të plotësohet pa procedura kushtetuese, në respekt me vendimet e Kushtetutës. Kjo ishte shumë e qartë. Këtë e thotë Zhao Suarez kur thotë “në përputhje me vendimet kryesore të Gjykatës Kushtetuese”; këtë e thotë rezoluta e Asamblesë Parlamentare e Këshillit të Evropës, kur i referohet vendimeve të Gjykatës Kushtetuese; këtë e thotë çdo njeri që i beson kushtetutave demokratike dhe shtetit ligjor. Kjo nuk ka asnjë lloj mëdyshje.

Në tryezë u shtrua propozimi tjetër, të cilin mediat e kanë bërë publike me dhjetra herë, por unë po ua them se duhet ta dini. Por ku ishte kundërshtia këtu? Zoti Rama e quan të mirëfilltë dhe të pakundërshtueshëm interpretimin që ai i bën vendimit të Gjykatës Kushtetuese. Ai e lexon vendimin në një mënyrë të atillë që i jep 100 për qind të drejtë të hetojë pa asnjë kufizim. Mu drejtua ç’është e vërteta jo pak, por dy-tri herë. “Më gjej t’i ku vendimi citon gjykatën” dhe u detyrova të marr vendimin, t’i lexoj paragrafin ku thotë: “se pakica ka të drejtë të pakufizuar me kushtin që të mos cenojë parimet bazë të Kushtetutës; se ka të drejtë, por të mos ndërhyjë, paragrafi tjetër, në aktivitetin juridiksional të gjykatave”. Gjykatat nuk janë për këngë, gjykatat janë për të dhënë vendime, gjykatat këtë aktivitet kanë. Pasi ia lexova, pati një ndërhyrje për mendimin tim logjike nga ana presidentit të Republikës, i cili i rikujtoi vendimet e Gjykatës Kushtetuese dhe i kujtoi se Gjykata Kushtetuese është garanti i Kushtetutës në Shqipëri. Shpesh bëhen citime të gabuara, por në të vërtetë në Kushtetutën e Shqipërisë, garanti i Kushtetutës është përcaktuar Gjykata Kushtetuese dhe për këtë vendimi ekziston. Atëherë u sugjerua dhe unë u shpreha i gatshëm që gjykata, në vullnetin e saj të pavarur, sepse nuk mund t’i imponohet absolutisht, t’i kërkoja një “amicus curiae” Komisionit të Venecias. Por përderisa ekziston një vendim gjykate, nuk mundet qeveria në asnjë lloj rrethane, që të nisë betejën me gjykatën e vet kushtetuese. Qeveria është e detyruar që të zbatojë vendimet e Gjykatës Kushtetuese. Se po të jetë për kështu, atë zinxhirin që përmend zoti Rama të atyre vendimeve, do t’i kishim çuar të gjithë në instancat ndërkombëtare, por nuk kemi dërguar asnjë, dhe i kemi pranuar.

Kjo nuk u pranua, prandaj dhe po bëj një sqarim për të gjithë shqiptarët, një sqarim për socialistët, se në rast se ata hynë në parlament pa marrëveshje, jo se unë nuk dëshmova një vullnet të plotë për marrëveshjen. E dëshmova edhe e dëshmoj, se pavarësisht se çfarë mund të mendojë ndokush unë jam thellësisht, jashtëzakonisht i interesuar që opozita të jetë në parlament. Ndaj edhe u detyrova që të bëja këtë sqarim, si rrjedhim i akuzave të pabazuara, se në u futëm në parlament pa marrëveshje, se u Berisha nuk ofroi. Berisha ofroi, Berisha ra dakord me ato sugjerime që u bënë nga ndërkombëtarë, nga ata që m’u kërkuan. Sa për dijeninë tuaj, pa shkuar në tryezën e presidentit m’u kërkua: A do të pranoje ti një të tillë për prokurorinë? Pa asnjë hezitim dhe pa asnjë kusht, jam shprehur. Aty në tryezë u shtrua: A pranoni që t’i drejtoheni Venecias? Pa diskutim pranoj, nuk kam asnjë lloj problemi. Por natyrisht sipas procedurave. Nuk mund që qeveria t’i drejtohet Komisionit të Venecias për vendimet e Gjykatës së vet. Kjo nuk ndodh, pa miratimin e gjykatës. Ka një vendim gjykate dhe duhet ta bëjmë të qartë këtë pasi, nuk duhet shkuar me mendimin si të krijojmë blloqe përpara. Dëshmi e kësaj është se qeveria nuk është ankuar në Venecia për asnjë vendim të Gjykatës Kushtetues gjer më sot. As nuk do të ankohet për sa kohë të jetë në pushtet kjo qeveri, do të respektohen të gjitha vendimet, pasi kështu është ndarë, kështu është përcaktuar. Ky është kuadri i pavarësisë së gjyqësorit. Ky është thelbi i saj, nuk merret pavarësia e gjyqësorit nga qeveria, nuk cenohet, respektohet. Unë këto kisha. Uroj dhe shpresoj që opozita të jetë e pranishme në të gjitha komisionet, në seancën parlamentare, ku do të trajtohen me seriozitetin më të madh propozimet e saj, si projektligji ashtu edhe vendimi”.