Kryetari i Partisë Demokratike të Shqipërisë, njëkohësisht Kryeministër, z Sali Berisha ftoi Lëvizjen Socialiste për Integrim të bëhet pjesë e koalicionit të ri qeverisës për të drejtuar së bashku vendin drejt integrimit në Bashkimin Europian.

 ”Jam këtu për të ftuar publikisht Lëvizjen Socialiste për Integrim për të krijuar së bashku një qeveri të re që do të mund ta quanim qeveri e integrimit të vendit në Bashkimin Europian.

Siç deklarova dy ditë më parë, sovrani na dhuroi fitoren, por diktoi koalicion. Nga partitë me të cilat programet janë më afër është LSI.

LSI në programin e saj ka si yll polar  integrimin e Shqipërisë në BE. LSI në programin e saj ka punësimin si kryefjalë të reformave dhe përpjekjeve të saj. LSI-në e ftoj gjithashtu me bindjen time se kjo nuk ka të bëjë me shifrat në parlament, por ka të bëjë me faktin se ajo është një përfaqësuese dinjitoze e spektrit të majtë.

Në fakt kjo parti, siç e di çdo shqiptar, në dy zgjedhjet e fundit ka qenë objekt real i një persekutimi të pamerituar ligjior, i një trysnie jo demokratike. Fatmirësisht aspak të lidhura me Partinë Demokratike, e cila është parti që nuk bazon qëndrimet e saj në eliminime dhe trysnira, por në qëndrime ligjore dhe parimore.

Nuk jemi ne që e demtuam atë përmës “Dushkut” në 2005. Nuk jemi ne që imponuam grevën e urisë. Jeni dëshmitarë që kam bërë thirrje të përsëritur në atë periudhë, që të gjendet gjuha e përfshirjes dhe jo e perjashtimit.

Në këtë kontekst shpreh kënaqësinë që ato rreth 47 % të votave që sovrani i ka dhënë Koalicionit të parë,  i shtohen tani edhe rreth 6 % të votave, tërësisht të spektrit të majtë dhe faktisht ky Koalicion fiton një bazë elektorale edhe më të gjerë sesa Koalicioni që ishte 4 vitet e shkuara.

Unë mendoj se Lëvizja Socialiste për Integrim, në interesin më të mirë të vendit duhet ta shqyrtojë dhe ta vlerësojë me sens pozitiv  ftesen time të sinqertë, sepse pavarësisht se për të gjitha forcat politike të vendit është e qartë se sovrani, përveçse votoi koalicionin tim, duke e nxjerrë atë si forcë e parë,  ka votuar për koalicon dhe është në ABC-në e politikës dhe në moralin e saj që vota  e tij të lexohet me korrektesë dhe ndershmëri. Kam besim se kjo forcë politike që ka si qëllim integrimin, reformat për punësimin, do t’i përgjigjet pozitivisht ftesës time , të hapur dhe të sinqertë.”

Pyetje : Z. Berisha po me Partinë Republikane çfarë do të bëhet , a do të jetë ajo në Koalicionin pazgjedhor?

Z. Berisha:  Ka një marrëveshje me Partinë Republikane dhe partitë  e tjera, koalicion para dhe pas zgjedhor. PR përfaqësohet në parlament nga Kryetari i saj dhe sigurisht që do të jetë pjesë e koalicionit.

Pyetje: Deklarata juaj  për të ftuar LSI-në do të thotë se ju keni marrë garanci për bashkëqeverisje?

Z. Berisha: Kjo është një ftesë publike që unë i bëj LSI-së dhe unë pres dhe shpresoj në reagimin pozitiv të kësaj force. Sigurisht që z. Mediu dhe Partia Republikane është pjesë e Koalicionit, por thashë edhe njëherë është çështje spektri. Me partinë Lëvizja Socialiste për Integrim ne zgjerojmë ndjeshëm bazën elektorale si dhe spektrin programor të koalicionit të qeverisë së ardhshme.

Pyetje: Kur flisni për një bashkëpunim me LSI-në, deri në çfarë termash jeni të gatshëm të negocioni dhe a keni një dhuratë për kryesocialistin Edi Rama, i cili sot ka ditëlindjen ?

Z. Berisha: Termat dhe çdo gjë në marrëveshjen për koalicion duhet të negociohen dhe përcaktohen, por bazat programore për koalicion ekzistojnë plotësisht.

Edi Ramës i uroj gëzuar ditëlindjen. Uroj që vitet që vijnë t’i sjellin më shumë rini.

Pyetje: Z. Berisha a i përmbaheni deklaratës suaj se LSI është gjysma e mollës së kalbur të PS-së ?

Z. Berisha: Ah, me limonada elektorale merresh ti…Si thotë Konica fjalë kazani…!

Pyetje: KQZ ka publikuar mbrëmë vonë rezultatet paraprake të zgjedhjeve të  28 qershorit, e cila ka ngjalluar një reagim të ashpër të PS-së. Ju si e shikoni këtë?

Z. Berisha : E dëgjova përfaqësuesin e shkëlqyer të politikës së re Gramoz Ruçin që u shfaq në tezat e tij të politikës së re. KQZ ka shpallur rezultate paraprake. Shpallja e rezultatit paraprak është një standard konstant, i kërkuar dhe i sanksionuar në dokumentat ndërkombëtare për zgjedhjet .

Por rezultati paraprak dhe rezultati difinitiv janë dy gjera krejtësisht të veçanta. Ndaj dhe zoti Ruçi sa mendon të mbledhë  njërëz  që nuk i shkon kush mbrapa përveç policëve të Bashkisë së Edi Ramës dhe kryepunëtorëve të Koço Kokëdhimës, më mirë të shkojë të ulet aty ku numërohen votat, të marrë lupën dhe të kontrollojë numërimin e ndershëm të tyre. Kaq e thjeshtë është zgjidhja. Çfarë kishte këtu për t’u revoltuar në atë mënyrë. Pale kur e din që nuk e ndjek kush mbrapa. Kur të matesh duhet të jesh i sigurt. Shko numëro votat ! Nuk mund të ketë proces më transparent se ky. Nuk kemi parë ndonjë proces më transparent se ky. U dha një rezultat paraprak, askush nuk  mund të thotë se eshtë përfundimtar dhe aq më tepër kur KQZ për të gjitha kutitë, më thanë që kanë votuar me 7 vota për praktikën që do të ndiqte. Atëherë nuk i mbetet gjë trjetër as palës tonë si dhe atyre, të shkojnë dhe të numërojnë votat e veta bashkë me KQZ.

Pyetje: Kur ftoni një parti të majtë në koalicion, kjo do të thote se i keni bërë mirë llogaritë për të patur një qeveri të qëndrueshme për të shmangur zgjedhje të parakoshme?

Z. Berisha: Së pari qeveritë e minorancës vetëm i ekstremisin situatat, se të preferueshme nuk janë.  Qeveri minorance në mandate mund të jesh, kur parlamenti vendos të të mbajë në pushtet për disa arësye, por në fakt nuk mund të thuash se je në mazhorancë nëse je me më pak vota se 50% në sistemin propocional. Në sistemin mazhoritar është ndryshe, të jemi realist ka një kod moral për këto sisteme. Në këtë kontekst ky ishte sistem propociopnal rajonal .

Atëherë përfshirja e LSI-së ka disa arësye madhore : tejkalon 50 % , krijon bazën morale dhe ligjore të plotë për të qeverisur, ka pika të përbashkëta programore . Jo rastësisht z Meta ishte vendosur në krye të Komisionit Parlamentar të Integrimit. Ky është,  të jemi realist varianti më i përshtatshëm për vendin sepse në këtë mënyrë do të ketë një qeveri solide, efiçente, të fortë dhe do të ketë një opozitë gjithashtu solide.

Imagjinoni ju  sikur të bëhej një koalicion gjigant dhe të mbetej opozita me 4 deputetë. Gjysma juaj do të dilnit në pension, ose do të ndërronit profesion, se s do të kishit lajme. Se vetëm me lajme të qeverisë gjithë ditën nuk rrihet,  apo s ‘është kështu se të mërzitën sigurisht. Kështu që kjo skemë është absolutisht interesi më i mirë i vendit. Edhe qeveri solide me pika kontakti programore edhe opozitë solide.

Pyetje: Z. Berisha , për hir të këtij interesi në të mirë të vendit a jeni i gatshëm ju që për një periudhë dy vjeçare ta këmbeni postin tuaj me zotin Meta?

Z. Berisha : Jam i bindur se koalicioni nuk funksionon në atë mënyrë. Jam i sigurt se koalicionet janë transparente. Shqiptarët kanë Sali Berishën njeriun më të votuar, e kanë pasur gjithnjë kështu. Pra kjo nuk është vetëm se mirënjohje e imja ndaj tyre, nuk mund t’i qortoj pse më votojnë mua në këtë shkallë. Ky koalicion nuk është pazar karrigesh. Ky është koalicion integrimi.

Kryetari i Partisë Demokratike të Shqipërisë,z. Sali Berisha në një intervistë për Agjencinë e Lajmeve Reuters deklaroi se ka gjithçka gati për të formuar mazhorancën e re.  

“Unë kam gjithçka gati për të formuar një mazhorancë të re. Por po pres me durim rezultatin përfundimtar nga Komisioni Qëndror i Zgjedhjeve. Nuk ishte  një fitore e gjerë, por është një fitore. Sido që të jetë e madhe apo e vogël, fitorja është e shndritshme !”

Kryetari i Partisë Demokratike të Shqipërisë  z. Sali Berisha në një prononcim për gazetarët e atashuar në selinë e PD-së , i cilësoi akte të shëmtuara ngjarjet e mbrëmshme në Fier dhe i bëri thirrje Kryetarit të  Partisë Socialiste të respektojë ligjin dhe të presë me durim verdiktin e sovranit.

“Përkundrejt një trendi, një drejtimi thëllësisht të qytetëruar, paqësor  të procesit zgjedhor, 24 orët e fundit fallangat e krimit të Partisë Socialiste, të udhëhequra nga Edi Rama bënë çdo përpjekje për të bllokuar këtë proces.

Dje në orët e para të mëngjesit pas mesnate Andis Harasani deputeti i PS-së, me sjelljen e një banditi ordiner sulmoi me karrige njeriun e ligjit, komisionerin e PD-së në Rrogozhinë, para kamerave të lokalit, ku numëroheshin votat për fajin e vetëm se ky komisioner po zbatonte ligjin.

Dje gjatë ditës Edi Rama përmes emisarëve të tij më komunikoi se ai kishte vendosur të mos njohë rezultatin e këtyre zgjedhjeve dhe se kishte vendosur të nxirrte popullin në protesta. Përgjigjia ime ishte se ky është një vend i lirë dhe se qytetarët mundet lirisht të protestojnë. Eshtë një standard i demokracisë shqiptare, i konsoliduar, por natyrisht rezultat zgjedhjesh me protesta nuk mund të ndryshosh. Me protesta do të mund të zhurmosh apo të mbrohesh nga humbja, apo nga rezultati i këtyre zgjedhjeve, por nuk mund ta ndryshosh.

Për koencidencë pikërisht emisarë, të cilët u dërguan për të komunikuar vendimin e Ramës për mosnjohjen e zgjedhjeve dhe që kërcënuan se do të organizonin protestat më të fuqishme popullore që ka njohur vendi, rastisi të jenë bisnesmenë në Tiranë dhe në Fier dhe ky është Koço Kokëdhima.

Nuk mund të them se pashë ndokund Koçon në mes të protestuesve në Fier, por ajo që ishte e sigurtë ishte se aty ishte dërguar policia bashkiake e Ramës në Tiranë dhe disa punëtorë mjeranë të Koço Kokëdhimës, të udhëhequr nga Gramoz Ruci.

Ai ishte një akt i ulët, një akt i shëmtuar. Që në fillim, kur në punë e sipër tensioni u rrit unë urdhërova çdo mbështetës, anëtar apo simpatizant të PD-së të largohej nga territori ku numëroheshin votat dhe ky urdhër u zbatua me përpikëmëri siç kanë treguar kamerat. Më pas komisionerët tanë mbaheshin peng në mënyrë të paskrupullt nga deputetë dhe turma e Partisë Socialiste dhe u kërkohej të numëronin nën diktatin e  tyre.

Zonja dhe zotërinj ! Në orët e para të mëngjesit të natës së parmbrëmshme komisionerët e Edi Ramës refuzuan në Kurbin të numërojnë 6 kuti. Ne nuk bëmë protesta , por respektuam  procedurat ligjore. KQZ dërgoi mjetet e veta dhe i tërhoqi kutitë e votave në Tiranë. Nuk u bë asnjë tentativë t’u imponohej komisionerëve socialistë qofte dhe gjeja më e vogël. Firmosëm mbi dokumentat se nuk do t’i numëronim në Kurbin. Edhe ne donim që numërimi të bëhej në Kurbin dhe aty ishim pakicë, por kjo nuk  u realizua dot  për shkak të komisionerëve socialistë . Askush nuk i rrethoi ata , askush nuk u bëri presionin më të vogël , përkundrazi zbatuam një vendim që edhe pse  nuk na u duk i drejtë, i sollëm kutitë në Tiranë.

Tani pse kërkohet të numërohen në Fier dhe jo në Tiranë, besoj që ajo që panë shqiptarët flet vet. Ata kanë frikë nga rezultati i vërtetë, ata donin që në Fier të përcaktonin rezultatin me hu , me dhunë. Arsyea e vetme është se donin të përcaktonin rezultatin me policët e bashkisë së Edi Ramës dhe me menaxherët apo kryepunëtorët e Koço Kokëdhimës. Akt i shëmtuar, mbajtën peng për orë të tëra komisionerët . U detyrova të dërgoj , për të mos acaruar situatën dy tre zonja , kandidate për deputete për t’u shprehur solidaritetin komisionerëve të mbajtur peng.

Erdha këtu së pari për të kërkuar nga të gjithë qytetarët , mbështetësit, aktivistët e PD-së, një gjakftohtësi qytetare,  për t’i bërë të ditur z. Rama se mund të protestojë, mund të organizojë çdo lloj proteste që të dojë, ky është vend i lirë . Por në mënyrë absolute nuk mund të ndryshojë as edhe me  një votë rezultatin e  këtyre zgjedhjeve. Nëse zoti Rama donte rezultatin e vertetë të qëndrave të panumëruara në Fier, pse donte të nxirrte atë rezultat me dajak dhe në kërcënime me kushtrime nga Tropoja gjer në Gjirokastër, për t’u mbledhur që në fakt u mblodhën vetëm policët e bashkisë dhe kryepunëtorët e Koço Kokëdhimës. Koçoja nuk  ishte vet. Koço i nxiti ata, por vet ishte në Pezë, vet e ndiqte nga Peza se atje shkon. Fle shpesh në Pezë, po në fakt,  ka miqësi atje.

Pra i bëj thirrje të ndjek ligjin, të zbatojë ligjin. Askush nuk mundet që në këtë proces transparent të cënojë qoftë edhe një votë të vetme. Pra ai që mendon se mund të nxjerrë rezultate me dajak, ai është Don Kishot, një qesharak.

Përsa i përket rezultatit kam  deklaruar që unë do të pranoj rezultatin që do të nxjerrë Komisioni Qëndror i Zgjedhjeve . Nuk kam dhënë vet asnjë rezultat deri tani, por të dhënat flasin qartazi. Kështu që kjo mazhorancë aktuale i ka të gjitha numrat dhe me vullnetin e  shprehur edhe nga deputeti Prifti, të cilin siç e keni dëgjuar publikisht, po e kërcënojnë në mënyrat më të turpshme.

Natyrisht nuk kam fituar aq sa do të doja dhe kam ndërmend të eci drejt koalicioneve. Pohova se do të zgjeroj koalicionin sepse këto janë rregullat. Ky është rregulli i demokracisë. Ne jemi një vend demokratik, do të negociojme koalicionin. Ka vullnete pozitive për koalicionin dhe ne jemi në frymën e kompromisit që kjo kërkon.

Sovrani votoi, sovrani diktoi koalicion ! Çfarë do të bëjmë ne? Do të themi se për inat të sovranit do të shkojmë në zgjedhje? Jo absolutisht,  do të respektojmë këtë që na dha, dhe t’i themi faleminderit shumë dhe të vazhdojmë më tutje.

E ftoj zotin Rama të ruajë gjakftohtësinë, ishte një akt i shëmtuar, jashtëzakonisht i shëmtuar. U nis apo nuk u nis për në Fier nuk e di sepse mediat qenë kondradiktore, por që të krijonte skena të atilla për vendin, vetëm për të diktuar një rezultat me dajak, kjo është gjë e turpshme, shumë e turpshme.”

Pyetje: Z. Berisha kur flisni për koalicion, deri tani PBDNJ, LSI ,PS  janë konfirmuar si parti parlamentare. Me cilat nga këto forca politike apo individë do të bejë koalicion PD ?

Partia Demokratike  synon dhe kërkon koalicion me forca politike. PD u përmbahet rregullave. Natyrisht mirëpret kontributet, por kur flas për koalicion, flas për koalicion me forca politike, natyrisht unë nuk jam për një koalicion të gjerë. Koalicionet e gjëra  kërkohen kur nuk ka mundësi për koalicione të tjera. Ky është rregulli i demokracisë !

Kërkohet koalicion i gjerë, kur koalicionet e tjera nuk japin dot qeveri. Vendi ka koalicione të tjera, të cilat mund të japin qeveri dhe fare stabël, fare stabël.

Pyetje : Z. Berisha ngjarjet e djeshme risollën në kujtesë bllokimet që kanë ndodhur në proceset e kaluara zgjedhore. A po i prishim standardet edhe këtë herë?

Z. Berisha : Ngjarja e djeshme ishte tepër e shëmtuar. Ai ishtë standardi i Edi Ramës, nuk ishte standardi i kësaj mazhorance dhe i qeverisë. Natyrisht zgjedhjet janë në proces shumë faktorial, por mendoj se ngjarjet e djeshme dhe ngjarja e shëmtuar në Rrogozhinë, kur Andis Harasani përdori imunitetin për të sulmuar si kafshë me karrige të tjerët para kameras i regjistruar,  do të shkojë në gjyq.

Nuk mund të sulmojë njeriun e ligjit në orën tre të natës. Një njeri të thjeshtë, të panjohur , një deputet shkon dhe e sulmon në atë mënyrë. Kam besim se drejtësia do të japë verdiktin e vet ndaj tij.

Ka patur raste të largimit të komisionerëve, qoftë socialistë dhe demokratë, absolutisht në shumicën e rasteve kanë qenë nga lodhja, sepse ishte një punë me shumë tension dhe lodhje. Nuk mund t’i fajësoj ishin dy netë pa gjumë. Përgjithësisht ka qenë një proces shumë i mire, me perjashtim të këtyre dy rasteve.

Dhe në Bushat dihet që famozi, përfaqësuesi i Ramës, e ka atë problem të fushatës. Ai është diku afër nga Trushi  dhe don që të dalë vet në krye, por nuk e votoi as komuna e vet. As fshati i vet nuk e ka votuar, por s’ka asnjë rendësi për mua, pasi aty procesi po ecën normalisht dhe është mbyllur.

Pyetje: Z. Berisha, procesi i numërimit zgjati jashtë parashikimeve , a do të rishikohet kjo porcedurë në proceset e ardhshme?

Z. Berisha: Po,  ajo që ishte e paparashikuar , pra kohëzgjatja e numërimit me kamera do të korrigjohet. Në zgjedhjet e tjera  do të përcaktohen qendra më të shumta numërimi, jo 64 sa janë, por mund të përcaktohen 128.

Nuk do të hiqet dorë nga elektronika, është arritje e madhe . Fakti që këto qendra janë online është fantastike. Çdo votë zoti Rama mund të shkojë ta kontrollojë nga KQZ-ja. Mund të çojë të gjithë bashkinë e Tiranës të numërojë votat në KQZ,  po të dojë çdo votë. Filmohen votat, por u filmua edhe Harasani, i cili i vërsulej si kafshë një njeriu në orën 3 të natës me karrige për t’i thyer kokën.

Pyetje : Z. Berisha a shpresoni të merrni të tjera mandate  në këto zona ende të panumuruara ?

Z. Berisha : Absolutisht nuk kam për t’u shprehur se as shpresoj dhe as se nuk shpresoj , vetëm do të pranoj atë numërim për të cilin nuk kam asnjë aresye të  dyshoj. Po pata dyshim edhe unë mund të dërgoj stafin tim në KQZ dhe të rrijë aty para kamerave dhe të numërojë. S’ka dyshim kjo. Është numërimi më transparent që është bërë në ndonjë vend ndonjëherë . Çfarë rezultati do të dalë, do të them po.

Ora 01:00

Partia Demokratike në një tjetër deklaratë përmes zëdhënëses së fushatës, znj Majlinda Bregu iu bëri thirrje mbështetësve të shmangin provokimet dhe të vazhdojnë festimet në shtëpi.

“Siç edhe mund të konfirmohet nga të gjithë kamerat që janë këtu e që mund të trasmetojnë pamje direkte nga selia e Partisë Demokratike janë duke u larguar të gjithë simpatizantët dhe militantët e kësaj partie të cilët janë duke lëvizur nëpër rrugët e Tiranës. Ndërkohë ju konfirmoj se pamjet që keni ndjekur të trasmetuara nga selia e Partisë Socialiste nuk kanë qenë në asnjë moment live. Situata përpara selisë së Partisë Socialiste është e qetë. Ju kërkoj të gjitha kamerave që janë pranë selisë rozë të konfirmojnë faktin se atje nuk ka asnjë konfrontim, por vetëm disa mbështetetës të Partisë Socialiste.

U bëj kërkesë të gjithë mbështetësve dhe militantëve të Partisë Demokratike që në këto momente të shmangin çdo lloj provokimi e gjaknxehtësie, sepse sigurisht që një ekzaltim në këto momente do të ishte një minus apo do të konfirmonte edhe një herë provokim ndaj asaj që nuk na duhet. Fitorja është një fitore e sigurtë, por e rëndësishme për ne është që të ruhet qetësia. Ndaj të gjithë mbështetësit e PD-së janë të lutur që në këto momente të gëzojnë nëpër shtëpitë e tyre.”

Ora 00:45

Zëdhënësja e fushatës në Partinë Demokratike, znj Majlinda Bregu përgënjeshtroi lajmet për prezencën e mbështetësve të PD-së në KZAZ-në e Fierit.

“Jam këtu për t’ju konfirmuar se asnjë nga mbështetësit e Partisë Demokratike nuk ndodhet para Komisionin e Administrimit Zgjedhor në Fier. Deputetët tanë, të cilët i patë edhe në pamjet që u trasmetuan nga Fieri kanë mbërritur atje më kërkesë të kryetarit të KZAZ-së, i cili po mbahet ende i bllokuar brënda bashkë me numëruesit e Partisë Demokratike, për të biseduar me kolegët socialistë me qëllim ç’tensionimin e situatës, e cila nuk është në të mirë të askujt.

Ky është një proçes që duhet të përfundojë sipas ligjit dhe sipas vendimit të marrë tanimë për numërimin e kutive nga Komisioni Qëndror i Zgjedhjeve.

Çdo përpjekje për të tensionuar dhe bllokuar më tej gjëndjen, sigurisht që ngarkon me përgjegjësi të gjithë iniciatorët e kësaj situate. ”

Ora 22:45

Partia Demokratike përmes zëdhënëses së fushatës, znj Majlinda Bregu i bën thirrje Kryetarit të Partisë Socialiste z. Edi Rama të mos nxisë konfliktin në Fier dhe të lejojë transportimin e kutive të votimit për në Komisionin Qëndror të Zgjedhjeve.

“Jam përsëri këtu për të bërë një thirrje nga Partia Demokratike drejtuar Kryetarit të Partisë Socialiste zotit Rama,  që të mos konfliktuojë situatën në Komisionin Zonal të Administrimit Zgjedhor në Fier.

Ajo çka është parashikuar në ligjin dhe Kodin Zgjedhor është detyrim për t’u respektuar nga të gjitha palët, akoma më tëpër nga Kryetari i Partisë Socialiste .

I bëjmë thirrje të mos nxisë konfliktin jashtë KZAZ-së në Fier, por të lejojë procesin e transportimit të kutive drejt  Komisionit Qëndror të Zgjedhjeve.  Ashtu siç parashikohet në Kodin Zgjedhor, në ligjin shqiptar, kur ka kontestime nga subjektet politike të përfaqësuara në KZAZ, vendimi merret nga autoriteti përkatës që është Komisioni Qëndror i Zgjedhjeve.

Sigurisht që bllokimi dhe mbajtja peng e procesit dhe e rezultatit në qarkun e Fierit nuk mund të jetë zotim dhe përmbushje e premtimit  të zotit Rama për të bërë ç’është e mundur për të plotësuar standardet dhe për të dhënë kontributin e tij në këtë proces.

Nëqoftëse deklarata e para dy orëve e Kryetarit të Partisë Socialiste se do të mbrojë me çdo kusht  çdo vote,   ka nënkuptuar bllokim dhe terror ndaj komisionerëve, numëruesve të Partisë Demokratike në KZAZ-në e Fierit, ju rikujtoj se në këtë vend përgjigjen e vetme për dhunimin e ligjit e jep vetëm ligji.”

Ora 20:20

Ndoqëm para pak minutash dy deklaratat e njëpasnjëshme nga Partia Socialiste me trillime dhe pretendime për bllokime, pengime, ndërhyrje në procesin e numërimit të votave në Komisionin Zonal të Administrimit Zgjedhor në qarkun Fier.

Ju bëj me dije se në KZAZ-në  20 në  Fier që ndodhet në shkollën “Perikli Ikonomi”, në momentin kur po mbyllej procesverbali për të nisur kutitë për numërim në Komisionin Qëndror të Zgjedhjeve, është shfaqur kandidati i PS-së Pirro Lutaj, i cili ka debatuar me përfaqësuesit dhe numëruesit e PD-së duke bllokuar dhe vonuar procesin.

Deri tani këto trillime për presione, bllokime dhe ëndërra për agjentë, të cilët sipas PS-së shfaqen duke u bërë presion numëruesve në KZAZ, janë dëgjuar shpesh herë nga Partia Socialiste.

Por unë e ftoj zotin Rama që të bëj publike nëse ka pamje të këtyre kërcënimeve në KZAZ,  sikurse kemi bërë ne mbrëmë me KZAZ-në e Rrogozhinës, ku është shfaqur kandidati i PS-së, Andis Harasani.

Z. Rama ka mundësi të vërtetojë nëse bën një akuzë kot apo nëse ka një realitet në atë që thotë sepse ka mundësi që në çdo KZAZ, ku ende vazhdon numërimi ka prezent kamera televizive si dhe janë prezent edhe kamerat e NEWS 24  dhe  kamerat e Top Channel.

Prandaj nëse ka edhe një material të vetëm filmik le të tregojë nëse ka patur një herë apo një moment për të vërtëtuar atë që thotë se procesi është bllokuar apo penguar nga përfaqësues të Partisë Demokratike.

Përsa i përket Kryeministrit Berisha,  zoti Rama merre me qetësi !

Ky proces kërkon durim, kërkon mbi të gjitha kurajo për të pranuar atë që shqiptarët tanimë e kanë vendosur.

Kryeministri Berisha është votëbesuar nga shqiptarët si Kryeministri, i cili do të drejtojë Shqipërinë e  standardeve europiane dhe të paktën për mandatin e  ardhshëm 4- vjeçar.

Prandaj të duhet një qetësi shume e madhe që të presësh rezultatin deri në fund.

Pyetje :  Zonja Bregu ju i qëndroni asaj që keni deklaruar dhe që u konfirmua edhe nga Kryeministri Berisha për shpalljen e fitores. Zonja Bregu zgjerimi i Koalicionit shkon tek LSI, PS, PBDNJ ?

Znj Bregu : Ajo se çka nuk pritet mirë nga Partia Socialiste në fakt ka të bëjë me frikën dhe presionin e brendshëm që kanë.

Unë e kuptoj ankthin e humbjes që ka mbërthyer gjithë selinë rozë. Sigurisht që ne jemi të interesuar dhe do të bëjmë ç’është e mundur për të vëzhguar deri në numërimin e votës së fundit.

Kjo qeveri është përgjegjëse më shumë se për të konfirmuar mandatin e këtij koalicioni, për të ruajtur standardet e zgjedhjeve në Shqipëri, e cila është fitorja më e madhe . As një qeveri tjetër nuk ka arritur të konsolidojë standarde zgjedhore në të gjithë procesin si këtë radhë.

Përsa i përket asaj se çfarë unë kam deklaruar më parë , e përsëris edhe njëherë,  ne presim vendimin e KQZ-së. Kam ftuar në deklaratën time të mëparshme KQZ-në që të bëjë publik rezultatin  sapo ai të përfundojë.

Nga ana tjetër rideklaroj dhe rikonfirmoj se koalicioni qeverisës që do të qeverisë Shqipërinë është koalicioni i djathtë.

Koalicioni qeverisës do të jetë stabël dhe me standarde europiane.

Pershëndetje të gjithëve që jeni duke ndjekur lajmin e konfirmimit  për  fitoren e dyfishtë  nga selia blu, fitoren e standardeve europiane të zgjedhjeve në Shqipëri dhe fitoren e sigurt të koalicionit qeverisës, i cili është votëbesuar në mazhorancë nga qytetarët shqiptarë që kanë votuar në datën 28 qershor.

Nuk ka asnjë dyshim tanimë, në të gjitha përllogaritjet që mazhoranca aktuale dhe koaliconi  “Aleanca e Ndryshimit” do të qeverisin Shqipërinë edhe për mandatin e ardhshëm 4-vjeçar.

Prandaj ju faleminderit të gjithëve atyre që na kanë votuar.

Ftoj KQZ-në dhe të gjitha Institucionet e tjera si dhe KZAZ-të që të përfundojnë procedurat e fundit të numërimit të votave dhe përllogaritjet finale zyrtare për të konfirmuar zyrtarisht atë të cilën unë po ju them paraprakisht nga selia e Partisë Demokratike, fitoren e Koalicionit qeverisës në Shqipëri.

Pyetje : Sa mandate keni si Koalicion?

Znj Bregu: Në të gjitha përllogaritjet që bëjmë,  të jeni të sigurt që kemi 71 mandate.

Pyetje : A do të jetë stabël ky Koalicion ?

Znj Bregu: Koalicioni që do të qeverisë Shqipërinë do të jetë  një koalicion stabël dhe i Shqipërisë europiane.

Ora 1.00

Më vjen keq dhe dua të shpreh keqardhjen për deklaratat e gënjeshtërta që po serviren nga PS në këto momente përsa i përket Rrogozhinës; e vërteta është krejt tjetër dhe këtë mund ta konfirmojnë dhe përfaqësuesit e OSBE-së që kanë qenë në KZAZ përsa i përket procesit të bllokimit.

Nuk ka asnjë shans dhe asnjë mundësi që ky proces të jetë bllokuar nga numëruesit e PD-së. Kanë qenë përfaqësuesit dhe numëruesit e PS që janë larguar nga KZAZ dhe më pas aty është shfaqur kandidati i PS-së që me veprime brutale dhe jo të hijshme ka filluar të prishë atmosferën dhe situatën e numërimit të votave, edhe pas vendimit që ka marrë Komisioni Zonal i Administrimit.

Unë edhe njëherë i drejtoj një thirrje Edi Ramës, që zotëria të mos mbajë peng procesin në Shqipëri, të mos mbajë peng standardet e zhvillimit të zgjedhjeve në Shqipëri dhe të mos i prishë standardet e zhvillimit të tyre.

Të mbajë premtimin dhe zotimin që ka dhënë se do të respektojë rezultatin, se do të punojë me forcën e tij politike që standardet e zgjedhjeve në Shqipëri të jenë të paprekshme dhe që zgjedhjet të kenë kontributin e të gjithë faktorëve politikë për t’ui konsideruar krejtësisht një proces i ndershëm dhe i qetë zgjedhor.

Njëkohësisht, i bëj thirrje kryetarit të Partisë Socialiste të mos çorodisë numëruesit e tij dhe as qytetarët shqiptarë me propozimin e skemave të vjetra të bllokimit të procesit, atje ku Partia Demokratike është në avantazh.

Të njëjtën gjë e ka bërë dhe në 2005, dhe në 2007, po e përsërit në 2009, nuk ka për t’i ecur as këtë radhë. Në  të gjitha zonat ku PD është në avantazh të dukshëm, skema e lajmëruar prej tij edhe në deklaratat e djeshme për të bllokuar procesin, nuk do të funksionojë as kësaj radhe.

Ndaj dhe njëherë z.Rama mos prish procesin zgjedhor, mos prish rezultatin e zgjedhjeve në Shqipëri, sepse ky proces është i gjithë shqiptarëve. Nuk është procesi i PS dhe nuk është procesi i cili luhatet sipas humorit të humbjes së PS-së në zona që konfirmojnë bindshëm fitoren e koalicionit qeverisës.

Ora 11:45

Partia Demokratike përmes Zëdhënëses së Fushatës, znj Majlinda Bregu deklaroi se komisionerët socialistë vazhdojnë të mbajnë të bllokuar procesin e numërimit në disa zona si dhe në Pukë nuk pranojnë të firmosin procesverbalin e rezultatit zyrtar.

“ Komisionerët socialistë kanë bllokuar përsëri KZAZ-në e Bushatit. Ndërkohë që  mbahet ende i bllokuar procesi i numërimit të votave në Rrogozhinë dhe në Kurbin, përkatësisht në Komunën Fushë Kuqe.

Njëkohësisht është bllokuar edhe firmosja e rezultatit zyrtar në Pukë. Pasi janë firmosur të gjitha procesverbalet e tjera nga KZAZ-të e Pukës nuk firmoset tabela e rezultatit përfundimtar. Puka është në qarkun e Shkodrës dhe dihet që Shkodra ka një fitore të sigurt të Koalicionit Qeverisës, të kryesuar nga Partia Demokratike.

Më vjen keq, por Rama po bllokon të gjitha qëndrat e numërimit,  ku fitorja e Koalicionit Qeverisës është e sigurtë dhe mesa duket kjo ndjesi e humbjes po i bën zotërinjtë e kampit përballë që të dalin jashtë kontrollit dhe të mos i përmbahen as zotimeve për  të respektuar  ligjin dhe standardet e një procesi zgjedhor të ndershëm,  pa e cënuar atë.

Përpjekjet për të bllokuar KZAZ-të në kundërshtim me Kodin Zgjedhor dhe me ligjin janë në kundërshtim edhe me frymën në të cilën janë zhvilluar këto zgjedhje.

Ndaj i kërkojmë zotit Rama që të urdhërojë menjëherë zhbllokimin e KZAZ-ve, të urdhërojë numëruesit të vazhdojnë procesin e  numërimit të votave në Bushat, në Rrogozhinë dhe në Kurbin. Të urdhërojë njerëzit e tij në  KZAZ- në, Pukë që të firmosin  tabelën përfundmitare, pasi është krejtësisht e pakuptimtë që në firmosjen e rezultateve në të gjitha procesverbalet, të bllokojnë firmosjen e tabelës përfundmitare.

Pyetje : Pse po mbahet peng rezultati në Bushat ?

Znj. Bregu: Bushati u bllokua dhe u mbajt peng për shkak se Kryetari i KZAZ-së,  i caktuar nga Partia Socialiste nuk u paraqit për më shumë se 4 orë rrjesht. Tani kemi njoftimin se numëruesit e rinj , të cilët kanë ardhur nga Partia Socialiste nuk po paraqesin dokumentat e tyre të indentifikimit që janë minimale për të zbatuar ligjin.

Pra janë njërëz të paidentifikuar as me pasaportë , as me kartë identiteti, nuk besoj se do ta kenë marrë kartën e identitetit sepse mesa duket kanë ndjekur deri në fund udhëzimet e zotërisë që i urdhëron nga partia e tij.